Biblioteca Duncan




Nesta páxina terá lugar un experimento social-literario marabilloso (ou, cando menos, curioso). Ao xeito dos grandes Radiohead e o seu 'In rainbows', que foi un dos primeiros albumes no formato de descarga 'paga o que ti queiras', irei posteando algunhas das novelas que escribín durante estes anos (desde o 2012 até o actual). Por seguir unha orde cronolóxica (e porque hai xente que me recomendou que non faga o que teño/tiña pensado facer), comezarei coa triloxía de 'As Crónicas de Bran'. Deixo aquí o directo que estes fenómenos fixeron do 'In rainbows' antes de meterme en materia...


As Crónicas de Bran

Para quen non o saiba, As Crónicas de Bran foron a primeira triloxía de fantasía épica publicada (completa) en galego. É, talvez, a miña obra máis xuvenil. Gusto de pensar, ou crer, que está a medio camiño da fantasía de Margaret Weis e da obra monumental do inmenso Michael Moorcock. Tamén é certo que ten moitos elementos do Wicca e das paisaxes da miña Taragoña natal, que van gañando importancia no segundo e, sobre todo, no terceiro libro. Do que si estou convencido é de que é unha historia en tres actos que, malia o seu escenario fantástico e botar man de druídas e dragóns, afonda na natureza humana e nos medos, desexos e demais paranoias que, ao final, constitúen un vieiro común en todas as miñas novelas.

Comezamos este mes co primeiro volume. Eu sempre digo que as Crónicas son un único libro publicado en tres partes. Dubidei se debía de publicar en dixital a historia completa, mais, ao final, decidinme por manter a estrutura da edición en papel e servirme deste minifundismo literario para tomar o pulso ao voso interese. Si, vós tamén sodes importantes porque aínda que pensedes o contrario e, mesmo, consideredes que esta historia non paga a pena, supuxo moitas horas de estudo, traballo e tempo que lle restei á miña familia.

Podedes descargar completamente de balde o primeiro libro en formato ePub (calquera lector de libro dixital) e en formato Mobi (os lectores Kindle). No panel da esquerda (a estas alturas xa vos quedaría un pouco arriba) tedes un botón para facer a vosa doazón (como fixeron os máxicos Radiohead), ou non. Tamén podedes agardar a que estea subida toda a triloxía e valorar se merece un pouco ou un nada, se o tempo de lecer que lle adiquedes é perdido ou se non está tan mal dentro da media do panorama literario actual.

Por favor, se algunha alma perdida nos mundos cibernéticos do Internet descarga algunha das novelas e quere comentar, compartir ou, simplemente, iniciar un faladoiro literario, facede uso da sección de comentarios na zona inferior desta páxina.

Ben, sen máis, aquí tedes a primeira entrega. O segundo volume da triloxía publicareino en outubro...

Descarga dixital (ePub) de A revolta dos Mestres

[Actualización a 17 de agosto de 2018]

Continuamos coa triloxía. Tócalle ao segundo volume, A porta de Annwn. Se A revolta dos Mestres foi a posta en escena dos personaxes e a presentación do 'problema' existencial de cada un deles, neste segundo libro atoparemos a explicación de toda a mitoloxía que rodea a historia de Bran: a orixe dos Forxadores, dos Tuatha, dos Fomoré, dos Primeiros Homes, das Sacerdotisas de Hermes... Tamén afondaremos no pasado de todos eles e nas motivacións que os levan a facer o que fan. Toda esa información saberémola de primeira man, á vez que emprenden unha viaxe até a Porta de Annwn, ese destino soñado e devecido por case todos eles, ese vieiro a un futuro mellor...

Descarga dixital (ePub) de A porta de Annwn
Descarga dixital (Kindle) de A porta de Annwn







[Actualización a 22 de setembro de 2018]

E xa chegamos ao final da triloxía. Non vou dicir nada deste terceiro volume. Quen chegase até aquí sabe que só lle queda o mellor por ler porque as Crónicas son unha aventura que vai a máis a medida que a trama avanza e imos coñecendo mellor ás personaxes. Adianteime, bastante, aos prazos que me tiña marcados, mais é que aconteceron cousas boas polo camiño. A máis importante é que unha nova novela miña verá a luz no vindeiro ano e quero estar centrado en todo o traballo previo que sexa preciso aportar. Ben, lémbrovos por derradeira vez que tedes a posibilidade de doar un pouco do voso diñeiro PayPal a esta causa (máis que nada para que non dea a impresión de que fago isto por amor á arte), pero, por suposto, tamén tedes a liberdade de considerar que estes tres libros non pagan nin o que vale unha caña.


Comentarios